రాత్రి నిఘా రాత్రి నిఘా...

రాత్రి నిఘా రాత్రి నిఘా...

గాయాల‌ను త‌డుముతూ

చీక‌ట్లో పెనుగులాట‌

రాత్రి నిఘా రాత్రి నిఘా

మౌనంగా సంభాష‌ణ‌

ఊపిరితో ఊసులాట‌

రాత్రి నిఘా రాత్రి నిఘా

గ‌ది నిండా ఏకాంతం

అయినా ఒక సంక్షోభం

రాత్రి నిఘా రాత్రి నిఘా

పొద్దు పొడుపు క‌ల‌గంటూ

పొర్లుతున్న చంద‌మామ‌

----

రాత్రి నిఘా రాత్రి నిఘా

ఒంట‌రిగా నెగ‌డు మంట‌

నూరుతున్న క‌త్తి మెరుపు

రాత్రి నిఘా రాత్రి నిఘా

నిశ్శ‌బ్దం నిశ్శ‌బ్దం

గ‌స్తీగా గుడ్ల‌గూబ‌

రాత్రి నిఘా రాత్రి నిఘా

వెలివేసిన పెనునిద్దుర‌

క‌ల‌ల‌న్నీ క‌కావిక‌లు

రాత్రి నిఘా రాత్రి నిఘా

ఉద‌యించే ఘ‌డియ వ‌ర‌కు

ఉక్క‌పోత‌లో సూర్యుడు

----

స‌వాలు చేసేదే క‌విత్వం

ఆశించిన‌ట్టు అక్ష‌రాల‌న్నీ పొందిగ్గా అమ‌రిపోతే
క‌విత్వం కోణార్క శిల్పంలా కాకుండా
జీవితంలా ఎందుకుంటుంది?

అయిదారంకెల జీతాల‌కు
జీవితాల‌ను తాక‌ట్టు పెట్టేసుకుని
ఆకాశం వైపు చూపు నిలిపి
నేల‌పై మీరు కురిపించే సానుభూతి
మ‌ధ్య‌లోనే ఆవిర‌వుతుంది.

ఆకాశం మీ చేతికంద‌దు.
నేల‌ను మీ పాదం తాక‌దు.
స‌రిహ‌ద్దుల మ‌ధ్య‌
సుర‌క్షితంగా బ‌తికిపోయే
భ‌ద్ర‌జీవులు మీరు.
బ‌క్క‌చిక్కిన బ‌తుకుల్ని చూసిన‌ప్పుడ‌ల్లా
మీరు మ‌హాక‌విని మ‌న‌నం చేసుకుంటారు.

కండ‌ల్ని కాక క‌ల‌ల్ని న‌మ్ముకున్న వాళ్లం.
క‌త్తులు దూసేందుకు
కండ‌లు కాక క‌లేజా కావాల‌ని తెలిసిన వాళ్లం.
వెన్నుత‌ట్టిన ప్రోత్సాహాల కుట్ర‌కు
ఎర్ర‌బ‌డ్డ అర‌చేతులే ప్ర‌త్య‌క్ష సాక్ష్యాలు.

గంగిరెద్దుల‌తో స‌మ‌స్య లేదు.
గానుగెద్దులు ఎప్ప‌టికీ మీకు విధేయ‌మైన‌వే!
ఎటొచ్చీ గ‌ర్జించ‌డం నేర్చుకుంటున్న సింహ‌ప్పిల్ల‌ల్తోనే...

క‌విత్వం ఇప్పుడు జూలు విదుల్చుకుంటోంది...

'వార్'నింగ్

అబద్ధాన్ని అచ్చోస్తే
సత్యంగా మారిపోదు...
ఉన్మాదుల వాచాలత
నిత్యంగా మిగిలిపోదు... 

---

జనమంతా దద్దమ్మలు
కారెపుడూ తెలుసుకో... 
పచ్చగుంపు పెద్దన్నా!
పదిలంగా మసలుకో..!

అజేయం...

మండేలా జైలులో ఉన్నప్పుడు తరచుగా చదువుకుంటూ స్ఫూర్తి పొందిన కవితకు నా సత్వరానువాదం...

జిజ్ఞాసి జీవిత చరిత్ర 'డావిన్సీ కళ... జీవితం' పి. మోహన్ పుస్తకంపై సమీక్ష

ఇది ఒక జిజ్ఞాసి జీవిత చరిత్ర. బహుముఖ ప్రజ్ఞాశాలి బతుకు పుస్తకం. ప్రపంచ ప్రసిద్ధ కళాఖండం 'మోనాలిసా' ను చిత్రించిన చిత్రకారుడిగా మాత్రమే జన సామాన్యానికి తెలిసిన లియోనార్డో డావిన్సీ గురించిన అనేక విశేషాలను, అతడి బతుకులోని ఎగుడు దిగుళ్ళను బొమ్మకట్టినట్లు ఈ పుస్తకంలో వివరించారు మొహన్. వృత్తిరీత్యా పాత్రికేయుడే అయినా, ప్రవృత్తిరీత్యా  కవి, చిత్రకారుడు అయినందునే మోహన్ వ్యయ ప్రయాసలకోర్చి తెలుగు పాథకులకు, ముఖ్యంగా కళాభిమానులకు కానుకగా ఈ పుస్తకాన్ని తెచ్చారు. ఐదు శతాబ్దాల కిందటే గతించిన ఇటాలియన్ చిత్రకారుడు, బహుముఖ ప్రజ్ఞాశాలి దావిన్సీపై ఆంగ్లం సహా పాశ్చాత్య భాషల్లో పలు పుస్తకాలు వెలువడ్డా, తెలుగులో మాత్రం ఇప్పటి వరకు అతడిపై సమగ్రమైన పుస్తకమేదీ లెదు. మోహన్ ఆ లోటు తీర్చారు. 

డావిన్సీ చిత్రకారుడు మాత్రమే కాదు, సంగీతకారుడు, శాస్త్రవేత్త కూడా. పలు శాస్త్రాల్లో అతడి ప్రతిభా పాటవాలు అమొఘమైనవి. ఆకాశంలో ఎగిరేందుకు విమానానికి నమూనాలాంటి ఆర్నితాప్టార్' రూపొందించిన మేధావి. శరీర నిర్మాణాన్ని తెలుసుకొనేందుకు శవాలను కోసి మరీ అధ్యయనం చేసిన జిజ్ఞాసి. భూగోళ, ఖగోళ శాస్త్రాలపైనా డావిన్సీ విస్తృత అధ్యయనం చేశాడు. అయితే, మోహన్ ఈ పుస్తకంలో ఆ విశేషాలను ప్రస్తావనకు మాత్రమె పరిమితం చెశారు. ఆ విషయాన్ని ఆయన ముందుమాటలోనే చెప్పుకున్నారు. తనకు గల పరిమితుల దృష్ట్యా డావిన్సీ శాస్త్ర రంగంలో చేసిన కృషిని విపులంగా వివరించకపోయినా, చిత్రకారుడిగా అతడి ప్రస్థానాన్ని, అతడి జీవిత చరిత్రను సమగ్రంగా అందించారు. 

డావిన్సీ గీసిన సుప్రసిద్ధ చిత్రాలే కాకుండా, అతడు గీసుకున్న స్కేచ్చులు, సగంలోనే వదిలేసిన బొమ్మలు, వివిధ చిత్రాల వెనుకనున్న గాథలను, వాటి చిత్రణలో డావిన్సీ ఎదుర్కొన్న సాధక బాధకాలను కథన శైలిలో వివరించిన తీరు పాఠకులను ఆకట్టుకుంటుంది. డావిన్సీ చిత్రాలను సైతం పుస్తకంలో చేర్చడం చిత్రకళాభిమానులకు కనువిందు చేస్తుంది. పునరుజ్జీవన కాలంలో చరిత్రను మలుపు తిప్పిన డావిన్సీ గురించి తెలుసుకోవాలనే చిత్రకారులు, చిత్ర కళాభిమానులు తప్పక చదవాల్సిన పుస్తకం ఇది. 

ఆదాబ్ హైదరాబాద్!

ఆదాబ్ హైదరాబాద్ పుస్తకంపై నా సమీక్ష 

సామాన్యుడి స్వగతం

బతుకులింక దుర్భరం 

సడలుతోంది నిబ్బరం 

పన్నులపై పన్నులేసి 

నడ్డి విరిచె ప్రభుత్వం